...اجندة كل سنة

السنة دي بقى قرر ميعملش زي كل مرة, أصله كل سنة بيعمل إيه؟, قبل السنة ماتخلص, بيشتري اجندة جديدة بتاعت السنة الجديدة, ويقول في نفسه, لأ السنة دي إن شاء الله مش هكسل.. أصله بيحب يكتب مذكرات, وكل سنة بيقول في عقل باله, أنا نفسي أجيب اجندة, أدون في كل صفحة بتاعت اليوم الحاجات اللي بتحصل في اليوم ده, عشان اعمل أكبر مجموعة ذكريات ومانساش أي حاجة اتعلمتها في أي يوم من حياتي

المهم إنه كل سنة يشتري الاجندة الجديدة, و تن تن تااااااااااااااان, مبيكتبش أي حاجة,

يمكن لو كان بيكتب مذاكرته واحداث كل يوم بيومه, يمكن ماكانش غلط كتير, كان اتعلم من الحاجات اللي كتبها, وكان فرح بإحساسه إنه لما يحب يفتكر أي حاجة حلوة, هيلاقيها أكيد في الاجندة بتاعته.. اجندة السنة

للأسف, كل الاجندات الفاضية بتاعت السنين اللي فاتت كانت بتضيع منه, ومبيعرفش يجيبها تاني, ماتفهمش عفريت بيخفيها ولا إيه!!... المهم انه مش بيعرف يجيبها تاني ,بالتالي مبيقدرش لا يجملها ولا يزينها أو حتى يمسح اللي فيها بالمرة عشان يستخدمها للسنة الجاية مادام هي كده كده ماتكتبش فيها حاجة تقريبا, مبيقدرش عشان هي بمنتهى البساطة: بح

السنة دي بقى غير كل سنة, هو قرر فعلا ومش هزار, ومتحمس آخر تلات أرْبع حاجات.. هيجيب اجندة جديدة, اجندة شكلها حلو عشان يحبها, وهيحرص قوي على إيه اللي هيكتبه فيها, عايزها تبقى كلها حاجات مبهجة, حاجات لو في يوم كان مخنوق, وفتح الاجندة, يقرا اللي فيها وهو سعيد بالكلام اللي كان كاتبه زمان وكان تقريبا ناسيه والاجندة هي اللي فكرته.. هيحرص إن حياته فعلا تتغير السنة دي.. هيحرص إن الاجندة دي تبقى محور حياته واهتمامه.. لانه زي ماقلتلكو, هو أصلا بيحبب الكتابة, غير كده, صاحبنا بيفكر لبعييد, بيفكر في ولاده اللي لسة لحد دلوقتي في علم الغيب, بيتخيل لو الاجندة دي وقعت في ايد حد فيهم, فعايز إن كل كلمة فيها تكون حاجة تشرف وتفرح, مايكونش فيها أي حاجة يخجل إن اولاده يشوفوها... وعشان هو هيكتب في الاجندة دي الحاجات اللي بتحصل في يومه, فـهو قرر إنه مش هيعمل في يومه غير الحاجات اللي تفرح أو تشرف وترفع راسه لما أجندته في يوم من الايام تتقري

بس خلاص

اضيف لمعلومات سيادتكم الآتي:

1) الليلة دي أول ليلة في السنة الجديدة :)

2)اجندة السنة اللي فاتت طلعت عند ربنا خلاص ( أصل كل سنة, في ليلة النصف من شعبان, الاعمال بتاعت السنة بتعرض على الله)

3)الاجندة بتتوزع مجانا كل سنة زي الليلة دي, كل واحد فيكم عنده 2 كمان مش واحدة, ( لو بصيت على كتافك, هتلاقي واحدة على اليمين والتانية على الشمال, واللي على اليمين هي اللي تهمنا)

4)ميزة الاجندة دي حاجة حلوة قوي, إن طول ماهية على كتفك, أو حتى لو طلعت عند ربنا, تقدر تمسح الحاجات الوحشة اللي فيها, صدقة بقى واستغفار وصيام عرفة والحركات دي, مش زي ماكان صاحبنا فاهم :)

5) اللي فيكم لسة عارف دلوقتي موضوع الاجندة ده, حتى لو بعد ماتوزعت بكام يوم, مش مشكلة, يقدر يقطع أول كام صفحة ويبتدي من أول ماعرف.. أصل الاستغفار والتوبة دول ليهم العجب

6) اللي هيشوف الاجندات بتوعك مش بس عيالك, دي البشرية كلها, العالمين يعني, وفي يوم مش هتكون عايز غير فعلا إنك تشوف في الاجندة حاجة تفرح أو تشرف أو ترفع راسك لفوق

خلي ربنا راضي عنك, وابدا سنة جديدة في حياتك, باجندة جميلة تحب تشوفها يوم القيامة, وكفاية قوي الكلام اللي اتكتب في الاجندات القديمة.. واللي إنت فعلا خايف إن البشرية كلها تعرفه يوم القيامة..

ليلة النصف من شعبان, سنة جديدة, اجندة جديدة..

وكل اجندة وأنتم طيبين :)