السلام عليكم
أولا كل عام و أنتم بخير, رمضان على الأبواب
أظن أغلبكم عارف فيلم "Pay It Forward" .. بس أنا هتكلم عن "Pray it Forward" من نفس المنطلق و فكرة الفيلم بس بالدعاء, الفكرة اننا ندعي لبعض, و كل واحد يدعي لغيره و طبعا لنفسه :) ..
الفكرة أصلا كانت من سنين, كنت بابعت ايميل لكل اللي عندي (أيام ما كان الايميل هو الأساس) و أطلب منهم يبعتولي ال "Prayers Lists" بتاعتهم لأن دعاء المسلم لأخيه بظهر الغيب مستجاب.. و الحمد لله كان بيوصللي عدد كبير و كان في ناس بتبعت Prayers List مطولة جدا, و ده كان شيء جميل فعلا..
الجميل في الأمر اني كنت بأتحرى مواعيد الاستجابة و أقول يا جماعة أنا هختم, يا جماعة أنا مسافرة , يا جماعة يوم عرفة , و هكذا, و اللي بيبعت بدعيله طبعا. أفتكرت ازاي كانت بتبقى أملة إن حد رايح عمرة و كلنا نهرع بطلب الدعاء منه/ها... و العجيب بقى ان ربنا و الحمد لله أكرمني بكذا عمرة و مع ذلك ما عملتش الموضوع ده ساعتها ولا مرة !!
المهم, رمضان على الأبواب, و إن شاء الله النية موجودة إني أعمل عمرة إن شاء الله و كان في العمر بقية, فبرجع أطلب منكم تبعتولي الأدعية بتاعتكو ..و فكرة "Pray it Forward" مش ليا أنا بس, اطلبو من الناس يدعلكو و اسألوهم تحبو تدعولهم بإيه بظهر الغيب, في ناس هتنح في الأول بس مايضرش, هتلاقو دعوات رائعة جاية في السكة :)
الموضوع ده له بالغ الأثر بجد, بيفتح في القلب حاجات لما تشوف ازاي الناس بتدعي و بتطلب إيه, بيفتح عليك بأفكار تدعيها انت لنفسك و عمرها ما جت على بالك إلا لما قرأت أدعية الناس التانية.. الأهم فعلا فعلا بتلاقي فرق, مش هنسى رسالة من واحدة صاحبتي بتشكرني و بتقوللي إن أغلب اللي كانت كاتباهولي اتحقق :).. الأعظم في الأمر كله, احساسك بقربك من ربنا و انت قاعد بتدعي للي بتحبه و للي مش فارق معاك أوي, لحظات صفاء نفس غير عادية, و بتحس فعلا بالصلة بالله, ناهيك عن كمية "و لك مثله" و كمية الحسنات اللي هتاخدها بإذن الله :)
إن شاء الله هبدأ بالايميلات القديمة اللي عندي حتى لو صحابها ما طلبوش :) , و هجعل جزء من الليل مخصص للدعاء فيها للغير, و لو ربنا كتبلي العمرة هطبع الورق و أخده معايا و أدعي منه إن شاء الله.
و هستنى دعواتكو على الفيسبوك أو الـ gmail .. و أنا شخصيا هبدأ أكتب الـ List بتاعتي لو حد طلبها مني :)
أخلصوا لله, و أدعو لبعض, الدعاء عبادة :)
Pray it forward
و كل عام و نحن إلى الله أقرب و على طاعته أدوم :)
رمضان كريم :)
