عايز 4 جنيه فكة

كل يوم بيرجع من نفس المشوار بتاكسي ودايما بيدفع للتاكسي 4 جنيه, هو يادوبك كده على مشوار زي ده.. ودايما بيعمل حسابه إنه يكون معاه 4 جنيه فكة عشان التاكسي مايرفضش يرجعله الباقي.

بس أحيانا بيبقى معاه 5 جنيه, مابيهتميش إنه يفكها, أصله مرات الطريق بيبقى زحمة, فـمش مشكلة يعني لما يدفع 5

في مرة كان معاه 10 جنيه, طبعا خاف إن التاكسي ياخد 6 ولا 7 جنيه, فـكان لازم يفكك الفلوس. طبعا أنتم عارفين البياعين في مصر, لو قلتله معاك فكة؟يقولك لأ واللهِ.. طبعا معاه وبيحلف كدب, المهم, كان بيفكر إنه لازم يشتري حاجة بالعشرة جنيه عشان يفكها

قعد يفكر يا ترى أجيب إيه؟.. أصله بالمرة بقى, مادام هيشتري يبقى يجيب حاجة عايزها, ميجبش مثلا بسكويت شمعدان اللي مش بيحبوا عشان يبقى معاه فكة يعني!!

صاحبنا لاقى إن اقل حاجة هيجيبها هتبقى بجنيه ونص.. بس كده الراجل هيرجعله 8.5, وممكن تبقى الخمسة مجمدة ويفضل معاه 3.5 ومايكفوش حق التاكسي.. ومش أكيد إن البياع يرجعله 5 جنيه فكة يعني.. اصلهم بيحبوا الفكة.. قام فَكر إنه يجيب حاجة بستة جنيه, أهو كده اضمن.. يجيب اللي عايزه وفنفس الوقت يضمن إن اللي هيرجعله 4 جنيه حق التاكسي اللي هو أصلا عايزه

صاحبنا راح اشترى الحاجة, كان معاه 10 جنيه, وكان هدفه إنه يبقى معاه 4 جنيه فكة.. اخينا صرف 6 جنيه بحالهم عشان يبقى معاه 4 جنيه بس, اللي هم كانوا معاه اصلا بس مش بصورة مباشرة, مش فكة يعني..

وجاب حاجات هايفة طبعا, أصله يعني هيجيب إيه من كشك في الشارع.. اكيد حاجة ساقعة وشوكولاتة, أو أي عك هو أصلا ماكانش عايزه..

بس خلاص, هي دي القصة..

العشرة جنيه هما الحاجات اللي عندنا, وال 4 جنيه هي الحاجات اللي مش عندنا وعايزينها وفاهمين انها هتفرحنا.. مشوار التاكسي بتاع كل يوم ده هو الحياة بتاعتنا اللي عايشينها وعايزين نبقى مبصوتين فيها.. سواق التاكسي هو الحاجات اللي بنخاف تحصل في حياتنا وتعكر فرحتنا.. والكشك هو التلاهي اللي في الحياة اللي ممكن تفرحنا بس بتبعدنا عن هدفنا وتضيع وقتنا...

القصة إن ربنا مدينا نعم كتير, أكتر من اللي محتاجينه, بس احنا مش مقدرين قيمتهم, بنبص دايما على اللي مش عندنا, حتى لو كان عندنا, بننسى إنها موجودة, ونفضل ندور على اللي شايفين إنه مش معانا.. دايما فاهمين إن السعادة في الحاجة اللي خسرناها أو مش فايدينا دلوقتي, مابناخدش بالنا إن اللي معانا يسوى أكتر بكتير من اللي فاكرين إنه هيفرحنا.. بنضحي باللي في ايدينا مها كانت قيمته عشان اللي مش فايدينا مهما كانت هيافته.. بمعنى آخر, بنستهبل.. وبعد مانسيب اللي معانا بنندم على إننا اتغيرنا, ونستغرب احنا ليه مابقيناش زي الأول وهو ا اللي بيحصلنا ده!..

هو اللي حصل ولا حاجة, غير إن كان معانا 10 جنيه وفكناهم, عشان يبقى معانا 4 جنيه