... تبصي تلاقي ربنا يكرمك :)

بابايا دايما يقولي الجملة دي, دايما بتيجي بعد جملة كانت قبلها, زي مثلا:

- "اتعودي دايما انك تدي المحتاجين, حتى لو إنتي شايفة انك محتاجة اللي معاكي, تبصي تلاقي ربنا يكرمك"

- "الناس الكبار ربنا حطهم في حياتنا عشان ناخد حسنات, بريهم و ريحيهم, تبصي تلاقي ربنا يكرمك"

- "معلش, استحملي غلاسة اخوكي الصغير, وأجبري بخاطره, تبصي تلاقي ربنا يكرمك"

- "كلمة الحمد لله دي نعمة كبيرة اوي دايما احمدي ربنا, تبصي تلاقي ربنا يكرمك"

- "لما تجيلك فكرة, ابدأي على طول نفذيها ابدأي في السعي ومتفكريش كتير, تبصي تلاقي ربنا يكرمك"

- "يا بنتي توكلي على الله ومتشليش هم حاجة, تبصي تلاقي ربنا يكرمك"

بس خلاص...

أنا بس حبيت أقول إني بصيت ولقيت إن ربنا بيكرمني دايما الحمدلله, وكرمه معايا مالوش حدود, ومنعم عليا بحاجات كتير, حاجات عظيمة زي إني الحمدلله من المسلمين

الحمدلله على عائلتي واصحابي وشركتي وشغلي, والناس اللي بشتغل معاهم, والناس اللي عارفهم, وعلى الحال اللي أنا فيه :)

أنا برضه مبسوطة بكل الحاجات الصغيرة اللي عندي, بما فيهم سواق الباص بتاعنا المحترم, ولون الحيطة بتاعت الشركة اللي أنا فيها, ورنة موبايلي, وقلمي الأزرق, وحاجات تانية كتير

والحمدلله لما بستنى الاسانسير بييجي على طول, وغالبا بيبقى فاضي, ولما آجي اركب تاكسي مش بيتخانق معايا, و بعرف أعدي الشارع حتى لو العربيات ماشية بسرعة, ولما أحب أشتري لبان بلاقي النوع اللي بحبه, ولما احب أساعد الناس, الاقيهم هم بيتصلوا يطلبو المساعدة, وحاجات تانية كتيير.. كفاية إني الحمدلله لما باعوز حاجة, بعرف اطلبها من ربنا, بغض النظر بتحصل ولا لأ, بس الدعاء في حد ذاته نعمة :)

دي حتى نعمة كبيرة قوي إني لما حسيت إني في نعمة, فتحت النوتس وكتبت, وحضراتكم دلوقتي بتقروها..

بصوا, وهتلاقوا ربنا بيكرمكم :)

الحمدلله :)